Qu'ei en linha lo Dicodòc navèth ! Que perpausa d'ara enlà traduccions, conjugasons, expressions, sinonimes, tèrmes especializats, toponimes e exemples en un solet utís dab un site dedicat - dicodoc.eu - e ua aplicacion mobila navèra.
Visitar lo site de Dicodòc Teledescargar las aplicacions mobilas
↳ Version teledescargabla deu dossièr de premsa (francés)
↳ Version teledescargabla deu dossièr de premsa (occitan)
11 ans après la soa mesa en linha, lo diccionari occitan de referéncia qu'a beròi pèthmudat : mercés a un tribalh de longa man de tractament de las dadas, aquera atruna de punta que perpausa d'ara enlà un sarròt de ressorsas e de servicis integrats. Que l'avem pensat tà qu'ajan los usatgèrs ua experiéncia enriquida e l'accès a ua lenga mei qualitativa.
traduccions
fòrmas conjugadas
definicions
expressions idiomaticas
sinonimes
exemples d'emplec
tèrmes especializats
toponimes
diccionaris numerizats
lexics especializats
Lo diccionari occitan mei complet qui sia
Dab 470 000 entradas, 2,2 millions de fòrmas conjugadas e un còrpus textuau de 2,2 millions de mots, Dicodòc qu'ei lo diccionari occitan mei complet qui sia. Que cobreish las sheis varietats màgers de l'occitan e que l'actualiza regularament l'equipa deu Congrès.
Ua interfàcia simpla e intuitiva
Un site dedicat - dicodoc.eu -, ua interfàcia soleta e de las simplas entà anar a las definicions, traduccions, expressions, conjugasons, aus lexics especializats, còrpus textuaus atau com a la basa toponimica. De mei, Dicodòc qu'ei rapide ! Los utilizators que'n van a sauts entre las ressorsas mercés a ua infrastructura numerica optimizada.
Ressorsas navèras
Gessit deu tribalh de tractament automatic de l'equipa deu Congrès, Dicodòc que'vs perpausa ressorsas navèras tà enriquir las vòstas recèrcas : diccionari de las expressions, diccionari deus sinonimes, o enqüèra conjugador qui a d'ara enlà ua version en occitan lemosin. Mercés a ua aliança dab editors, Dicodòc qu'intègra uei lo dia un còrpus textuau de 2,2 millions de mots extrèits de 400 òbras de la literatura classica e contemporanèa occitana.
Aplicacions derivadas e servicis en linha
Impulsatz lo vòste environament numeric dab Dicodòc ! La navèra aplicacion mobila Dicodòc qu'ei teledescargabla a gratis de las botigas Google Play e App Store ençà. Lo corrector ortografic e lo clavèr entaus telefonets que'vs guarantiràn tot dia l'usatge d'ua lenga de qualitat.
L'aplicacion aquesta qu'ei un multidiccionari francés-occitan, occitan-francés e definicions, que i caben uei vint diccionaris (10 fr-òc, 6 òc-fr, 1 òc-òc e 3 istorics).
Trobatz suu pic la conjugason integrau de cada vèrbe tà quate varietats de l'occitan : gascon, lengadocian, lemosin, provençau.
Basa de dadas de las expressions, de las citacions e deus arreproèrs en occitan.
A partir d'un mot, trobatz los sinonimes associats. Aquera ressorsa que l'an bastit mercés au tractament automatic deu Dicodòc.
Que's tròban aquí lexics especializats taus com lo lexic de l'espaci public urban, lo lexic d'Internet, lo lexic occitan deu comèrci, etc.
Aquera basa qu'a l'objectiu d'estar, a tèrme, un endret unic on i caberàn tots los toponimes en occitan.
Avetz un dotbe tà çò de l'emplec d'un mot o de la soa accepcion segon los contèxtes ? Ací que n'avetz las fòrmas atestadas en un còrpus literari occitan de referéncia, dab un bònus : la possibilitat d'enténer ua part d'aqueths tèxtes.
Lo Congrès permanent de la lenga occitana qu'ei l'organisme interregionau de regulacion de l'occitan. Qu'òbra en los maines de la lingüistica e deu TAL (tractament automatic de la lenga).
Que produseish utís lingüistics numerics de referéncia (diccionaris, conjugators, correctors ortografics...), aplicacions entau TAL (sintèsi vocau, traduccion automatica...) e aplicacions entaus telefonets (clavèrs predictius...).
Qu'a tanben missions de regulacion lingüistica e de recèrca scientifica aplicada.
Qu'ei l'editor de Dicodòc (multidiccionari occitan), Revirada (traductor automatic occitan) e Votz (sintèsi vocau occitana).
Entà tota informacion mei, contactar Lo Congrès.
© Lo Congrès Permanent de la Lenga Occitana, 2020, Totes los dreits reservats
Premsa