B'ac sabem : que nse'n vedem entà picar un SMS en occitan dab un clavèr predictiu francés, dab un resultat aleatòri... En per'mor d'aquò, Lo Congrès qu'a realizat clavèrs predictius entaus telefonets e entà las tauletas Android, en occitan gascon e lengadocian.
La possibilitat d'utlizacion suus telefonets, aquiu un enjòc deus màgers entà ua lenga minorizada. Atau los clavèrs aquestes que son un utís deus mei importants entà la socializacion de l'occitan en la vita vitanta.
Que's realizè dens l'encastre deu projècte ROLF (Ressorsas Utís Lengas de França : alsacian, occitan, picard).
Que's tròba un par de paquets de lenga entà l'aplicacion Anysoftkeyboard, un clavèr a gratis qui a la licéncia libra.
Qu'an suenh de la coeréncia lingüistica e deu riquèr lexicau : que caben 931 000 fòrmas flechidas entau gascon e 708 000 entau lengadocian, dab noms pròpis e noms de merca.
ROLF qu'ei ua aliança entre lo Congrès permanent de la lenga occitana, CLLE-ERSS (CNRS/Universitat Tolosa Joan-Jaurès), Habiter le monde (Universitat d'Amiens) et LiLPa (Universitat d'Estrasborg) sostienut dens l'encastre de l'aperet a projèctes 2017 « Lengas e numeric » de la Delegacion generau a la lenga francesa e a las lengas de França-Ministèri de Cultura e la Comunicacion.
Aqueth projècte qu'ei la continuitat deu projècte ANR RESTAURE (RESsorsas informatizadas e Tractament AUtomatic entà las lengas REgionaus) en lo quau se desvolopèn divèrsas ressorsas e utís TAL (Tractament automatic deu lengatge) entà tres lengas de França : alsacian, occitan e picard. Las realizacions deus objectius de RESTAURE(1) que son suu bon camin. Totun, que realizèn los desvolopaments de faiçon concertada mes independenta entà las tres lengas. L'idea d'aquera proposicion qu'ei de definir entà las ressorsas lexicaus un format unic qui premeterè de crear lo medish tipe de ressorsa entà las tres lengas, de perpausar ressorsas qui aurén lo format e las anotacions identicas (dab per exemple los medishs jòcs d'etiquetas entà las categorias similaras en las diferentas lengas) e d'aver utís d'ajuda a la creacion d'aqueras ressorsas partatjadas entà las tres lengas.
Dens aqueth encastre, que's harguèn tanben clavèrs predictius entau picard e entà l'alsacian. Los desvolopaments entà cada lenga que's hasón de faiçon independenta mes concertada.
Entà tota informacion mei, contactar Lo Congrès.
Premsa
