Premsa

Clavèrs predictius en occitan

B'ac sabem : que nse'n vedem entà picar un SMS en occitan dab un clavèr predictiu francés, dab un resultat aleatòri... En per'mor d'aquò, Lo Congrès qu'a realizat clavèrs predictius taus telefonets e tà las tauletas Android, en occitan gascon e lengadocian.

La possibilitat d'utlizacion suus telefonets, aquiu un enjòc deus màgers tà ua lenga minorizada. Atau los clavèrs aquestes que son un utís deus mei importants tà la socializacion de l'occitan en la vita vitanta.

Que's realizè dens l'encastre deu projècte ROLF (Ressorsas Utís Lengas de França : alsacian, occitan, picard).

Las aplicacions

Que's tròba un par de paquets de lenga tà l'aplicacion Anysoftkeyboard, un clavèr a gratis qui a la licéncia libra.

Qu'an suenh de la coeréncia lingüistica e deu riquèr lexicau : que caben 931 000 fòrmas flechidas tau gascon e 708 000 tau lengadocian, dab noms pròpis e noms de merca.

ROLF

ROLF qu'ei ua aliança entre lo Congrès permanent de la lenga occitana, CLLE-ERSS (CNRS/Universitat Tolosa Joan-Jaurès), Habiter le monde (Universitat d'Amiens) et LiLPa (Universitat d'Estrasborg) sostienut dens l'encastre de l'aperet a projèctes 2017 « Lengas e numeric » de la Delegacion generau a la lenga francesa e a las lengas de França-Ministèri de Cultura e la Comunicacion.

Aqueth projècte qu'ei la continuitat deu projècte ANR RESTAURE (RESsorsas informatizadas e Tractament AUtomatic tà las lengas REgionaus) en lo quau se desvolopèn divèrsas ressorsas e utís TAL (Tractament automatic deu lengatge) tà tres lengas de França : alsacian, occitan e picard. Las realizacions deus objectius de RESTAURE(1) que son suu bon camin. Totun, que realizèn los desvolopaments de faiçon concertada mes independenta tà las tres lengas. L'idea d'aquera proposicion qu'ei de definir tà las ressorsas lexicaus un format unic qui premeterè de crear lo medish tipe de ressorsa tà las tres lengas, de perpausar ressorsas qui aurén lo format e las anotacions identicas (dab per exemple los medishs jòcs d'etiquetas tà las categorias similaras en las diferentas lengas) e d'aver utís d'ajuda a la creacion d'aqueras ressorsas partatjadas tà las tres lengas.

Dens aqueth encastre, que's harguèn tanben clavèrs predictius tau picard e tà l'alsacian. Los desvolopaments tà cada lenga que's hasón de faiçon independenta mes concertada.

Contacte

Tà tota informacion mei, contactar Lo Congrès.