La Farga numerica es una plataforma collaborativa d'accès, de valorizacion, d'escambi e de desvolopament de las ressorsas e dels otisses TAL (tractament automatic de las lengas) e informatics per la lenga occitana. Respond a un besonh identificat de la comunautat e dels desvolopaires per çò que pertòca l'accès a de donadas qualificadas, la mutualizacion de la velha, la coordinacion de las òbras e lo partatge dels desvolopaments.
↳ Version teledescargabla del dossièr de premsa (francés)
↳ Version teledescargabla del dossièr de premsa (occitan)
Inspirada dels espacis de mutualizacion e de collaboracion de la comunautat del logicial libre (distribucions Linux, seguidas logicialas, etc.), La Farga numerica vòl èstre a la convergéncia de las iniciativas. Mercés a son interfàcia evolutiva, ofrís una garba de ressorsas e de foncionalitats de cap als desvolopaires e als contributors : inventari qualificat e actualizat de las ressorsas, fuèlha de rota numerica, estandards informatics adaptats a l'occitan, contacte dels diferents actors e projèctes estructurants, cridas a projèctes, cridas a contribucions, messatjariá instantanèa, publicacions scientificas, velha tecnologica.
L'objectiu de La Farga numerica es de far mai aisit lo trabalh dels que desvolopan d'otisses numerics en occitan, en recensant en un sol endreit las ressorsas a lor disposicion. Pòdon èstre de donadas qu'an la licéncia dobèrta, de logicials liures, de modèles pre-entraïnats, d'API que se pòdon utilizar per programar... mas tanben de vocabulari tecnic o d'estandards que permeton de far de l'occitan una lenga a l'encòp subjècte e objècte del numeric.
De còrpus, de logicials, de servicis... pels que trabalhan dins lo TAL o l'informatica occitana, amb un sagèl de qualitat e tanben una seccion especifica per las API e una per las novetats.
De prepausicions d'etiquetas, de formats... estandardizats e interoperables amb las nòrmas internacionalas, e tanben adaptats a las especificitats de la lenga e la cultura occitanas.
Lo vocabulari de l'informatica e de las novèlas tecnologias, per totes los que produsisson de contengut en occitan a prepaus de las tecnologias de la lenga, coma los que reviran de logicials.
De petits tutorials pel public grand coma pels iniciats, per integrar melhor l'occitan dins lors practicas numericas : cossí picar los accents, passar Firefox en occitan, installar un corrector...
La Farga numerica anima un servidor Discord sul qual la comunautat informatica occitana se pòt retrobar per escambiar e trabalhar amassa.
Quand d'unas lengas an de multinacionalas que trabalhan a far avançar lor tractament automatic, d'autras an pas de milierats de personas qu'òbran a lor informatizacion. L'occitan, coma un fum d'autras lengas pauc dotadas, deu una granda part de sas avançadas al contributiu, al collaboratiu e a l'open source.
La comunautat que s'ocupa de TAL occitan es escampilhada dins mantun parçan d'Occitània, e quitament per d'unes a l'internacional. La Farga numerica vòl far lo ligam entre totes aqueles actors que trabalhan, de còps, cadun dins son canton. Vòl èstre lor luòc d'encontre, d'escambis per favorizar l'emulacion e lo borbolh d'idèas.
Per aquò far, prepausa un espaci per totes los qu'an enveja de participar a la granda aventura de las tecnologias de la lenga per l'occitan. I trobaràn de notícias que balhan de claus per contribuir dins mantun domeni, de cridas a participacions, de contactes per ajudar los qu'an un projècte numeric...
Fa mantuna annada que d'actors institucionals e de contributors trabalhan sul tractament automatic de la lenga occitana. Dempuèi la primièra fuèlha de rota pel desvolopament numeric de l'occitan en 2014, ensajan d'obrar de faiçon coordonada de cap a d'objectius comuns.
Existís uèi una vertadièra dinamica dins aquel domeni, amb de grands actors e de projèctes estructurants, mas tanben una galaxia de contributors que permeton a l'occitan d'aver de ressorsas e d'otisses de qualitat, dins un camp que mantuna lenga « pauc dotada » i es pas tant rica.
La situacion actuala per las ressorsas e los otisses del TAL occitan : traduccion automatica, sintèsi vocala, lexics bilingües, còrpus audios...
Qualas son las estructuras darrièrs los otisses qu'utilizatz ? Qual òbra a la constitucion de las ressorsas qu'entraïnan las IA o que noirisson los algoritmes ?
Los actors s'amassan a l'entorn de mantuna iniciativa, per i mutualizar lors ressorsas e lors competéncias, e desvolopar de servicis pel public grand.
Descobrissètz las « petitas mans » de las tecnologias de la lenga en occitan, de professionals e de benevòles que bastisson los otisses informatics.
Bibliografia de publicacions scientificas que pertòcan lo TAL e la lenga occitana.
La Farga numerica es un portal editat pel Congrès.
Lo Congrès permanent de la lenga occitana es l'organisme interregional de regulacion de l'occitan. Òbra dins los domenis de la lingüistica e del TAL (tractament automatic de la lenga).
Produsís d'otisses lingüistics numerics de referéncia (diccionaris, conjugators, correctors ortografics...), d'aplicacions pel TAL (sintèsi vocala, traduccion automatica...) e d'aplicacions pels telefonets (clavièrs predictius...).
A tanben de missions de regulacion lingüistica e de recèrca scientifica aplicada.
Es l'editor de Dicodòc (multidiccionari occitan), Revirada (traductor automatic occitan) e Votz (sintèsi vocala occitana).
La Farga numerica es eissida del projècte Linguatec IA.
Lo projècte « Linguatec-IA, desvolopament de las coneissenças en intelligéncia artificiala per la numerizacion de l'aragonés, del catalan, del basco e de l'occitan » a per objectiu de recercar e desvolopar de modèles neuronals novèls aplicables a las lengas feblas en ressorsas, e bastir una infraestructura lingüistica transfrontalièra intelligenta que faga mai aisida la comunicacion entre locutors de lengas diferentas e l'accès multilingüe a l'informacion.Linguatec IA es cofinançat per :
Per tota informacion mai, contactar Lo Congrès.
© Lo Congrès Permanent de la Lenga Occitana, 2020, Totes los dreits reservats
Premsa